مسدود ماندن پوهنتون‌های دولتی به دلیل مشکلات اقتصادی

آریانا نیوز: سرپرست وزارت تحصیلات عالی گفته که دلیل مسدود ماندن پوهنتون‌های دولتی مشکلات اقتصادی حکومت طالبان است…

مولوی عبدالباقی حقانی سرپرست وزارت تحصیلات عالی در دیدار با مسوول بخش آسیایی کمپنی توسعه استراتیژیک جرمنی گفته که دلیل مسدود ماندن پوهنتون‌های دولتی مشکلات اقتصادی حکومت طالبان است.

حقانی ضمن تشکری از همکاری‌های استراتیژیکی دولت جرمنی با پوهنتون‌های افغانستان گفته که وزارت تحصیلات نیازمند همکاری‌های کوتاه مدت و طویل المدت جرمنی است.

او همچنین اضافه نمود که تکمیل پروژه های ساختمانی برخی پوهنتون‌ها، معیاری سازی پوهنتون کابل و تقویت سیستم انترنتی پوهنتون ها از اولویت ها و نیازمندی های عاجل این وزارت می باشد.

سرپرست تحصیلات عالی با اشاره بازشدن پوهنتون‌های خصوصی گفته که دلیل مسدود ماندن پوهنتون‌های دولتی مشکلات اقتصادی می‌باشد.

در این نشست، حشمت الله مراد رییس کمپنی توسعه استراتیژیک جرمنی در افغانستان نیز گفته که نیازمندی‌های وزارت تحصیلات عالی را مورد بررسی قرار داده و در خصوص اقدامات و تطبیقات عملی این برنامه‌ها در نشست بعدی صحبت خواهند کرد.

بر بنیاد اعلامیه، در این نشست اولیفِر وکیل و مشاور کمپنی توسعه استراتیژیک جرمنی از ادامه همکاری‌های خود با وزارت تحصیلات عالی اطمینان داده است.