آریانا نیوز: رییس اجراییه کشورمان در راس یک هیأت بلندپایه دولتی عازم تاجکستان شد…
داکتر عبدالله، امروز پنجشنبه در راس یک هیأت بلندپایه دولتی به منظور اشتراک در هفدهمین اجلاس سران حکومت‌های سازمان همکاری‌شانگهای عازم دوشنبه پایتخت تاجکستان گردید.
در این سفر صلاح‌الدین ربانی وزیر امورخارجه و تعدادی از مسوولین حکومتی داکتر عبدالله را همراهی می‌کنند.
داکتر عبدالله، در اجلاس سران حکومت‌های سازمان شانگهای که سالانه برای ارزیابی وضعیت منطقه و سیاست‌های این سازمان برگزار می‌گردد به نماینده گی از دولت افغانستان اشتراک و سخنرانی می‌کند.
رییس اجراییه در حاشیه نشست سران حکومت‌های شانگهای با رییس جمهور تاجکستان، صدراعظم فدراتیف روسیه، صدراعظم جمهوری خلق چین٬ صدراعظم جمهوری ازبیکستان، صدراعظم جمهوری قزاقستان٬ صدراعظم جمهوری قرغیزستان٬ صدراعظم جمهوری تاجکستان، صدراعظم بلاروس و وزیر امورخارجه هند دیدار می‌کند.
داکتر عبدالله در سخنرانی خود در این اجلاس و در دیدارهای خود با مقامات و نماینده گان کشورهای مختلف در حاشیه اجلاس در کنار موضوعات مختلف به طور عمده پیرامون نیاز مبرم مبارزه مشترک با دهشت‌افگنی، مبارزه با قاچاق مواد مخدر، گسترش همکاری و همگرایی منطقوی، تطبیق برنامه‌های کلان منطقوی، افزایش دادوستد بازرگانی و جلب حمایت کشورهای منطقه از روند صلح به مالکیت و رهبری افغانستان صحبت خواهد کرد.
