آریانا نیوز: ملا عبدالغنی برادر معاون رییس‌الوزرای طالبان از نهادهای امنیتی خواسته در اخذ قروض برشنا شرکت از زورمندان همکاری کنند…
انعام الله سمنگانی معاون سخنگوی طالبان روز دوشنبه (22 حمل) در تویترش نوشته که کمیسیون اقتصادی حکومت سرپرست طالبان با ریاست ملابرادر تشکیل جلسه داده است.
به گفته او، در این نشست ملا عبدالغنی برادر معاون رییس‌الوزرا و رییس کمیسیون اقتصادی دستور داده تا نهادهای امنیتی در اخذ قروض شرکت برشنا همکاری کنند.
شرکت برشنا گفته است که پس از سقوط نظام جمهوریت، شمار زیادی از زورمندان و ادارات دولتی قرض‌های‌شان را نپرداخته‌اند.
به گفته این شرکت، عدم پرداخت قرض‌ها از سوی مقروضان، شرکت برشنا را با مشکل جدی مواجه کرده است.
کمیسیون اقتصادی طالبان در دستور دیگر به بانک مرکزی هدایت داده است تا برای رفع محدودیت‌های بانکی بر شرکت‌های دولتی یک میکانیزم منظم ترتیب دهد.
