آریانا نیوز: تاجران و سرمایه‌گذاران افغان مقیم اوزبیکستان در دیدار با سرپرست وزارت امور خارجهٔ کشورمان مشکلات‌شان را در عرصه‌های گوناگون کاری با محمد حنیف اتمر در میان گذاشتند و خواهان حمایت و همکاری حکومت برای رفع این چالش‌ها گردیدند…
محمد حنیف اتمر سرپرست وزارت امور خارجهٔ جمهوری اسلامی افغانستان، که در راس هیأت عالی‌رتبهٔ افغانستان در تاشکند به سر می برد، با نمایند‌گان جامعهٔ تجارتی و سرمایه‌گذاران افغان مقیم اوزبیکستان دیدار و مشکلات آنها را استماع کرد.
در این دیدار، شماری از تاجران و سرمایه گذاران، در پیوند به فعالیت‌های تجارتی و سرمایه‌گذاری خویش معلومات داده در مورد فرصت‌های تجاری میان دو‌کشور صحبت کردند. آنها افزودند که بخشی از تولیداتِ اوزبیکستان می‌تواند بدیلی مناسب‌تر و ارزان‌تر در مقایسه با تولیدات سایر کشورها، برای بازارهای افغانستان باشد.
تاجران و سرمایه‌گذاران مشکلات‌شان را در عرصه‌های گوناگون کاری با سرپرست وزارت خارجه در میان گذاشتند و خواهان حمایت و همکاری حکومت برای رفع این چالش‌ها گردیدند. بنابر توضیحات سرمایه‌گذاران، مشکلات و چالش‌هایی در عرصه‌های گوناگون وجود دارند؛ از جمله در بخشهای خدمات بانکی، گمرکات، ترانسپورت، ترانزیت، اقامت تاجران، رفت‌و‌برگشت در شرایط قرنطین، و توزیع پاسپورت‌های خاص برای تاجران.
سرپرست وزارت امور خارجه، ضمن ابراز خرسندی از دیدار با تاجران و سرمایه‌گذاران، از آنها خواست همه مشکلات‌شان را به صورت نوشتاری ارایه بدارند تا به آنها پرداخته شود. در ادامه، آقای اتمر در مورد صحبت‌هایش با وزیر خارجه و صدر اعظم اوزبیکستان در خصوص مسایل تجارتی و سرمایه‌گذاری و ایجاد سهولت‌های وعده‌شده از جانب دولت اوزبیکستان معلومات داد و وعده کرد تا مشکلات مطرح‌شده را در همکاری با رییس‌محترم عمومی دفتر مقام رئیس جمهوری و وزیران بخشهای سکتوری پیگیری نموده برای آنها راه‌ّ‌حل‌های لازم جستجو کند.
در این دیدار، آقای شاکر کارگر رئیس عمومی دفتر مقام ریاست جمهوری، آقای محمد یما شمس سرپرست وزارت فواید عامه، آقای عبدالکریم ملکیار سرپرست وزارت تجارت و صنعت، داوود نورزی رئیس برشنا موسسه، آقای اجمل احمدی سرپرست دافغانستان بانک و سایر اعضای هیأت همراه نیز حضور داشتند.
