درخواست رییس پوهنتون امریکایی افغانستان از امریکا

آریانا نیوز: دیوید سدنی رییس پوهنتون امریکایی افغانستان می گوید، که برای تأمین امنیت پوهنتون امریکایی افغانستان به کمک‌های مالی ایالات متحده نیازمند است….

چند روز پس از نشر گزارش سی‌ان‌ان، دیوید سدنی رییس پوهنتون امریکایی افغانستان می‌گوید، که برای تأمین امنیت این پوهنتون به کمک‌های مالی ایالات متحده نیازمند است، اما برای جلب این پشتیبانی‌ها پس از سال 2020 تلاش می‌کنند.

رییس پوهنتون امریکایی افغانستان با نشر پیامی تویتری می‌گوید، که هنوز هم صلح پایدار در افغانستان یک آرزو است و به حقیقت نپیوسته است. سدنی تأکید کرده است، که تا تحقق این رویا ضرورت ادامۀ کمک‌های مالی برای تأمین امنیت پوهنتون امریکایی افغانستان یک واقعیت است.

سدنی گفته است، که تلاش می‌کنند تا برای ادامۀ فعالیت‌های این پوهنتون تا پس از 2020 پشتیبانی‌های مالی جذب کنند.

یادآوری می کنیم، که در گزارش سی‌ان‌ان آمده بود، که بودیجۀ سالانه ٢٨ ملیونی این پوهنتون تا ٦٠ فیصد وابسته به کمک دفتر توسعۀ بین‌المللی امریکا است.

برخی منابع به سی‌ان‌ان گفته‌ بودند، که از ماه مارچ سال ٢٠٢٠ قرارداد کارمندان بین‌المللی به ‌خاطر کمبود بودیجه تصویب نشده است و ممکن است پوهنتون امریکایی افغانستان نتواند به کارش ادامه دهد.