آریانا نیوز: رییس جمهور کشورمان در رأس یک هیئت بلند پایۀ دولتی صبح امروز یکشنبه عازم پایتخت ترکمنستان گردید.
به گزارش آریانا نیوز به نقل از خبرنامه ارگ ریاست جمهوری، رییس جمهور محمد اشرف غنی امروز صبح در رأس یک هیئت بلند پایۀ دولتی برای سفر رسمی یک روزه عازم عشق‌آباد پایتخت ترکمنستان گردید.
رییس جمهور درین سفر ضمن ملاقات های جداگانه با قربانقلی بردی محمدوف رییس جمهوری ترکمنستان و امام علی رحمان رییس جمهوری تاجکستان در مراسم رسمی گشایش مسابقات آسیایی نیز اشتراک خواهد کرد.
رییس جمهور را در این سفر صلاح‌الدین ربانی وزیر امور خارجه، محمد حنیف اتمر مشاور امنیت ملی، اکلیل حکیمی وزیر مالیه، داکتر محمد همایون قیومی مشاور ارشد رییس جمهور در امور زیربناها، محمد شاکر کارگر نمایندۀ خاص رییس جمهور در امور کشورهای آسیای میانه، سیروس علاف مشاور رییس جمهور در امور تجارتی و محمد هارون چخانسوری معاون ارتباطات استراتیژیک و رسانه‌های ریاست دفتر مقام عالی ریاست جمهوری همراهی می نمایند.
