آریانا نیوز: به گفته سخنگوی ادارهٔ تنظیم امور زندان‌ها، دوز اول واکسین کرونا بر زندانیان محبس‌های ۳۴ ولایت کشور تطبیق گردیده است…
ادارهٔ تنظیم امور زندان‌ها، از پایان تطبیق دوز اول واکسین کرونا بر زندانیان محبس‌های مرکز و ولایت‌های افغانستان خبر می‌دهد.
صفی‌الله جلالزی، سخنگوی این اداره گفت، ریاست صحیه ادارهٔ تنظیم امور زندان‌ها، در جریان تطبیق دوز دوم این واکسین است.
او افزود: واکسین اول ضد کرونا در زندان‌های ۳۴ ولایت افغانستان تطبیق گردیده که در حدود ۱۷ هزار تن از زندانیان و پرسونل زندان‌ها از آن مستفید شدند و دوز دوم در ۲۲ ولایت افغانستان بر حدود ۷ هزار تن از زندانیان و پرسونل تطبیق گردیده است.
جلالزی گفت که اقدامات پیشگیرانه و تدابیر وقایوی نیز، قبلاً از سوی ریاست صحیه ادارهٔ تنظیم امور زندان‌ها، برای پرسونل و زندانی‌ها در نظر گرفته شده و مواد شوینده، ضد عفونی، ماسک و دست‌کش برای پرسونل و زندانیان توزیع شده است.
