- خبرگزاری آریانا نیوز - https://ariananews.co -

واکنش وزارت امور خارجه به حملهٔ طالبان بر دفتر یوناما در ولایت هرات

آریانانیوز: وزارت امور خارجهٔ جمهوری اسلامی افغانستان حملهٔ مسلحانهٔ طالبان بر دفتر یوناما در ولایت هرات را با شدیدترین الفاظ محکوم کرد…

در اعلامیه وزارت امور خارجه آمده است:

طالبان با انجام این‌گونه حملات، خشونت‌ها را وارد مرحله جدید ساخته اند که بدون تردید می‌تواند تبعات خطرناکی را در پی داشته باشد. ادامهٔ این‌گونه جنایات موجودیت سازمان‌های بین‌المللی و فعالیت‌های‌شان را در کشور شدیداً به مخاطره خواهد افگند.

نقض گستردهٔ حقوق بشر و قوانین بین‌المللی بشردوستانه از جمله قتل‌های خودسرانهٔ افراد ملکی، کشتار اُسرای جنگی، محاکم صحرایی، شلاق‌زدن زنان و انفجار زیربناها و اماکن ملکی و اکنون حمله بر سازمان ملل متحد، که نمایندگی از جامعهٔ بین‌المللی می‌کند، بخشی از جنایات بشری روزافزون طالبان به‌شمار می‌روند. افزایش بی‌پیشینهٔ خشونت‌ها و ارتکاب پیوستهٔ جرایم جنگی از سوی طالبان، عدم پابندی این گروه را به قوانین و تعهدات بین‌المللی ثابت می‌سازد.

دولت جمهوری اسلامی افغانستان از جامعهٔ جهانی و نهادهای مسؤول بین‌المللی می‌خواهد تا طالبان را در قبال جنایات و جرایم جنگی و عدم پابندی‌شان به قوانین بین‌المللی بشردوستانه مسؤول و تحت پیگرد قرار دهد.

وزارت امور خارجهٔ جمهوری اسلامی افغانستان همچنان از نهادهای بین‌المللی می‌خواهد تا با اعمال فشارهای لازم، طالبان را وادار به قطع فوری خونریزی و جنایات جنگی نمایند.